Offm Sandhaufa

Immr no isch miar dees Foddo gwärde,
Wo dia Buaba ond dia Mädla
Midd miar offm Sandhaufa g'hoggd send:
Dees war neinzehondertfuffzg,
Als ma oosre Schdross teerd hodd,
Onsre Kendrstubb, d'Fluarstross en Näarle.

Do warads no alle als Kendr derbei,
Nach deam Griag hodd ma viele Kendr g'hedd.
Do war däar Ualrichs-Michl midd seiner Gerdrud,
Däar Staudameiers-Ulli, dia zwoi Renadls,
Dr Straußa-Hansl, alle no rechd gloi –
Ond nuar miar Zwoi läbad heid no...

Sibbzg Joar isch dees iatzd häar,
Viel send miar domols g'wäse
Ond alle send middr Zeid verschwonda,
Midd deane miar oinschdmols g'lebd hond:
Dia Straußa, dia Libbaberger, Ualrichs,
Schendas, Boschs, däar Kannstein, dia Möhnles...

Dees send Nama, dia koinr mäar kennd,
Leid, dia d'Zeid middgnomma hodd,
So wia se onds middnemma wird.
Koinr wird se nach oos omdräa,
Nedd amohl dia Foddos saga dann,
Wäar wann was wo g'wäsa isch...


©Hans Hartmut Karg
2022

*