Alles muaß ma läarna

©Hans Hartmut Karg
2018

Wäar nix läarnd, däar bleibd a Schdogg,
Muaß sei Läba elend frischda,
Als hädd'r nuar an oinz'ga Rogg
Ond miasd koine Schdäll ausmischda.

Doch wäar sei Hiera eig'schald hodd,
Fiar dean gibbd's guade Schaasa,
Dass däar em Läba selig godd,
Ond emmer vora seine Nasa.

Ma läarnd endferna se von Däbba
Ond wia ma mid deam Smardfoan schaffd,
O wia ma mid Freind kaa WhatsÄbba,
Foddos verschiggd, weil ma dees raffd.

Dia diggidale Wäld isch groaß,
Do ka ma alles emmer googla
Oo findet mancher Schatz ond Schoaß
Em Netz ? ond muaß dabei ned huudla.

So wächsd ons zua a neie Wäld
Midd Kicha-Äbbs ond bahn.de.
Ja, mancher, däar verzoggd sei Gäld
Ond siggd nemme dia Wäld, dia schee.

*